الموبايل داخل مع الزبون فاصل باور، وأول ما تحطه على الباور سبلاي يسحب تيار عالي يوصل لـ 5 أمبير لوحده. ده اللي بنسميه التسريب الكلي، والأعطال دي انتشرت في الفترة الأخيرة في الموبايلات الحديثة.
الفني عادة بيبدأ بالطرق المعروفة زي حقن التيار، وساعات برضه ما يعرفش يحدد مكان التسريب، فيتهم آيسي الشحن أو آيسي الباور بناءً على القاعدة المشهورة: «التسريب يضر ما قبله». لكن في حالات كتير النتيجة بتطلع مختلفة تمامًا.
الممانعات سليمة، طب العطل فين؟
هنا ييجي دور قياس الممانعة على المسارات الأساسية: VBAT وVPH وVBUS. بس ممكن الممانعات دي تطلع سليمة، والعطل الحقيقي يكون في مسارات الـ Buck الداخلية اللي بتغذي المعالج أو الشبكة أو الـ GPU. والـ Buck هنا هو الدائرة اللي بتخفض الجهد وتطلع منها تغذية كل قطاع.
بص على الجدول ده لمنظومة الـ BUCK بتاعة معالج MT6771 مع آيسي باور MT6358 وشاحن BQ25890:
| اسم المسار | نقطة القياس | السحب قبل الضغط على مفتاح الباور | السحب بعد الضغط على مفتاح الباور |
|---|---|---|---|
| VPH_POWER | C2708 | FULL SHORT | -- |
| VPA_PMU | C2002 | FULL SHORT | -- |
| VS2_PMU | C2020 | -- | 0.003m.a ثم الرجوع للصفر |
| DVDD_CORE | C2046 | -- | 0.091m.a ثم الرجوع للصفر |
| DVDD_PROC_B | C2047 | -- | 0.047m.a ثم الرجوع للصفر |
| DVDD_PROC_L | C2044 | -- | 0.018m.a ثم الرجوع للصفر |
| DVDD_MODEM | C1601 | -- | 0.010m.a ثم الرجوع للصفر |
| VS1_PMU | C1630 | -- | 0.010m.a ثم الرجوع للصفر |
| DVDD_GPU | C1620 | -- | 0.013m.a ثم الرجوع للصفر |
| EMI_VDD2 | C2016 | -- | 0.004m.a ثم الرجوع للصفر |
خد بالك من الفرق: VPH_POWER وVPA_PMU بيدوك FULL SHORT قبل ما تضغط باور، وباقي المسارات بتسحب بعد الضغط وترجع للصفر.
مين المسؤول لو كل القيم سليمة؟
هنا كتير من الفنيين بيقفوا محتارين. وزي ما نوهنا قبل كده، بعض الدوائر زي آيسي الـ BOOST في أجهزة iPhone ممكن تسحب 5 أمبير لما ترفع جهد الحقن على مسار VDD_MAIN لـ 4.6 فولت.
ونفس الظاهرة بتحصل في بعض أجهزة Android اللي فيها MT6358: تسريب على مسار VPA، وده المغذي لمضاعفات الطاقة في دائرة الشبكة، بيعمل نفس السحب.
Warning: لما يصعب عليك تحديد مكان التسريب، ارفع الصاجة المعدنية فوق دوائر الشبكة الأول. بس بشرط أساسي: إن آيسي الشحن ما يكونش فيه دائرة OCP (Over Current Protection).
مكثفات PMID: الفخ اللي يخليك تغير آيسي الشحن كذا مرة
من التجربة العملية، مكثفات الـ PMID بتاعة دائرة الشحن غالبًا بتديك الشكل ده:
- سحب منخفض قبل الضغط على زر الباور.
- استجابة للضغط.
- وبعدين عدم إقلاع.
لكن في بعض الأجهزة اللي فيها أنواع معينة من آيسي الشحن، المكثفات دي ممكن تعمل تسريب كلي، يعني 5 أمبير قبل الضغط على زر الباور، فتفضل تبدل آيسي الشحن مرات كتير من غير فايدة.
ادرس الدائرة مش اسم الموبايل
إحنا ما بنفصلش بين آيفون وأندرويد، إحنا بندرس الدائرة الإلكترونية نفسها، وعشان كده بنعتمد في التحليل على أسماء الآيسيهات زي الجدول اللي فوق، مش أسماء الموبايلات.
الفهم الإلكتروني السليم بينور عشرات اللمبات في دماغك وانت بتتتبع، وبيوصلك للعطل بسرعة ودقة من غير إفراط في الحرارة ولا إتلاف البوردة.