ورد سؤال عن آيسي مكتوب عليه U5002 في بوردة SM-A047. ليه موجود في الجهاز ده تحديدًا؟ روحت أدور في المخطط عن الآيسي U5002 واتضح إنه FUEL GAUGE (FG). وهو المسؤول عن تحديد حالة البطارية من حيث الحرارة وتيار البطارية وجهدها، عشان يعرف نسبتها المئوية وقابليتها للشحن.
الجملة اللي لفتت انتباهي
في المخطط مكتوب: A12 DOES NOT HAVE NTC ON BATTERY. التنويه ده من سامسونج معناه إنها مش بتثق في تحديد حالة البطارية إلا باستخدام آيسيهات تابعة لمنظومتها، زي الشحن والباور من النوع S وSM وS2M. وده اللي اتعودنا عليه حتى لو سامسونج استخدمت معالج غير بتاعها (Exynos) زي MEDIATEK.
لكن الغريب في الجهاز ده إن سامسونج استخدمت معالج Exynos ومستخدمتش آيسي شحن تابع لها، واستخدمت آيسي شحن من النوع BQ (مش تابع لسامسونج). فإزاي المعالج هيفهم حرارة البطارية وهي مفيهاش مقاومة حرارية زي ما سامسونج قالت بنفسها؟
هنا بييجي دور آيسي MAX
آيسي تابع لها من النوع MAX بيخاطب المعالج ويمده ببيانات البطارية. وهنا الحقيقة وضحت: هدف الشركات المصنعة هو تكامل المنظومة. وبديل الآيسي ده هتلاقيه في أي جهاز فيه معالج Exynos وآيسي شحن BQ.
أعطال الآيسي ده
اللي أثارني إن أغلب برامج المخططات بتتجاهل رسم مسارات الآيسي ده، رغم إنه ممكن يسبب أعطال كتير:
- شحن وهمي.
- تنبيه حرارة.
- عدم الاستجابة للشاحن.
- أخطاء في قراءة البطارية ونسبتها المئوية.
- وممكن كمان يفصل الهاتف باور.
يعني لو جالك جهاز فيه الأعراض دي، لا تحصر الشك في آيسي الشحن والباور وبس، وراجع الـ Fuel Gauge ومساراته.