جهاز جالك وفيه واحدة من تلات حاجات: مثلث أصفر على الشحن، أو تنبيه إن حرارة الهاتف مرتفعة أو منخفضة، أو السحب يرفع معاك كأنه هيبدأ شحن وبعدين ينزل تاني. التلاتة دول بيودوك على منظومة الحرارة. بس بشرط واحد: البوردة نفسها ماتبقاش بتسخن.
ليه الحل الجاهز مش كفاية؟
الحلول الجاهزة ادتنا تلات أماكن لمقاومات حرارية، ومفيش ولا واحدة فيهم بتاعة الشحن. والجزء ده مهم: إحنا بننسب منظومة الحرارة للآيسي، مش للجهاز. يعني ماتقولش مقاومة الجهاز، قول مقاومة الآيسي ده.
اللي الحل الجاهز ادانا يطلع جنب المعالج. روحنا الـ Layout وعرفنا اسمها، دورنا عليها في الاسكيماتيك، لقيناها جزء من دايرة تجزئة جهد، ومشينا ورا مسار الاستشعار لحد الآيسي المسؤول. وصلنا للمعالج.
الدليل عند المعالج
لما نفتح جزء المعالج في المخطط نلاقي الرموز المهمة: AUX ADC، وADC Therm، وTR Therm بتاعة منطقة الترانسيفر، وBAT Therm. أهو ده اللي بندور عليه: BAT Therm بتاعة الشحن، والحل الجاهز ماذكرهاش.
وطبعًا المقاومة الحرارية جزء من مقسم جهد. نتتبع المسار لفوق، نلاقي جهد ومقاومة توالي على البوردة العلوية. طب النص التاني من المقسم، المقاومة التانية، فين؟ على البوردة السفلية. يعني المنظومة نفسها متقسمة بين بوردتين، والبوردة السفلية ملهاش مخطط. نعمل إيه؟ نرجع للقواعد.
الخطوة الأولى: احسب رقم الرجل صح
المسار دخل على الكونكتور. والرجل اللي البرنامج مرقمها تسعة وعشرين مش هي، لأن الترقيم ماشي لتحت، ولما تتبع المسار هتلاقيها الرجل 27. فاقرا الترقيم الأول قبل ما تعتمد على الرقم.
- شوف الكونكتور زجزاج ولا متتالي. الرجول هنا زجزاج: صف فردي وصف زوجي.
- حدد الكونر الأول من الـ Layout: رجل 1 فين.
- عد على الصف الفردي: 1، 3، 5، لحد 27.
- اعمل علامة بسيطة، وعد من أقرب طرف ليها عشان ماتتلخبطش. هنا طلعت الرجل السابعة من فوق على الشمال.
الخطوة التانية: اعكس في دماغك
الفلاتة لما بتتركب بتتعكس. فالرجل اللي كانت السابعة من فوق شمال، لما تقلب الفلاتة تبقى السابعة من تحت شمال.
وفي الجهاز ده الفلاتة رخمة: مدمجة مع فلاتة تانية، بتدخل على الشاشة الأول وبعدين تكمل للموصل. فمش هتعرف توصل بالعد بس.
الخطوة التالتة: البازر هو اللي يحكم
- حوّل الأفوميتر على البازر، ولمس الطرفين ببعض تتأكد إن الصوت شغال.
- حط طرف على رجل الكونكتور اللي علمتها.
- حط الطرف التاني وابدأ لف على نقط البوردة السفلية.
هتلاقي البوردة السفلية عليها مادة حماية، وعازلة، فالطرف مش هيلمس. لازم تشيلها في المكان ده، وأنا استخدمت مزيل دهنات. ولما تعدي المسار، هتلاقي المكونات اللي بتكمل المقسم: المقاومة التانية، ورجلها التانية على الأرضي.
الفايدة
- مش كل حاجة في الحلول الجاهزة.
- المقاومة الحرارية دايرة تجزئة جهد، وممكن تكون متقسمة بين بوردتين: فوق وتحت.
- التنبيه أثناء الشحن: طبق على المسار اللي طالع من البوردة العلوية للسفلية، حتى من غير مخطط.
ممكن تفتح جوجل وتسأل عن المقاومة وخلاص، بس انت كده مش اتعلمت. الهدف إنك تعرف تتبع، بمخطط أو من غيره.