وأنا براجع Datasheet لأحد آيسيهات الشحن من نوع BQ، لقيت مكتوب فوق الآيسي: I2c Controlled. يعني اللي بيتحكم في عمل الآيسي ده هو المعالج، عن طريق بروتوكول i2c. افهم منظومة الشحن زي ما تحب، بس افتكر دايمًا إن اليد العليا للمعالج.
ده معناه إني أعامل منظومة الشحن وسحباتها حسب نوع المعالج؟ مش بالظبط. أنا مش عايزك تحفظ، أنا عايزك تدخل على عطل الشحن فاهم وتتبع النقاط دي.
أربع نقاط
- مفيش قاعدة ثابتة إن آيسي شحن من نوع معين يتقرن بمعالج من نوع معين. ممكن تلاقي جهاز بمعالج كوالكوم مع آيسي شحن BQ، مع إن الأخير مشهور إنه ملازم لأجهزة ميدياتك.
- مش كل معالجات كوالكوم بتمنع الإقلاع لو وصلت على الباور سبلاي الموجب والأرضي بس، أو بترفض الشحن من غير مساري BattOn وBattTherm. معالجات كوالكوم الحديثة بتعمل كده، ويقف السحب على التيستر أو الباور سبلاي عند 200 مللي أمبير. أما معالجات كوالكوم القديمة فبنفس التوصيلة الجهاز بيشتغل عادي وبيشحن، وبعدين يرجع للصفر بعد ما يكتشف مشكلة المسارين (وممكن يتضموا تحت مسار واحد).
- ممكن تلاقي جهاز بمعالج ميدياتك، بعد ما ترفع المعالج وتركب البطارية وتوصل الشاحن، يسحب أكتر من 800 مللي أمبير، يعني بيشحن. هنا آيسي الشحن ما بيعتمدش على المتحكم ببروتوكول i2c لبداية الشحن، لكنه هيرجعله بعد كده لاستكمال بيانات الشحن وإيقافه أو استمراره.
- مش كل ما يسحب أكتر من 800 مللي أمبير على التيستر يبقى بيشحن (ممكن شورت أو عطل بيانات وإضاءة). ومش كل ما يسحب أقل من 60 مللي أمبير يبقى فاصل باور (ممكن شورت أو ضعف توصيل أو مسار id).
الخلاصة
الموضوع كبير فعلًا. دائرة الشحن من وجهة نظري أقوى وأعلى في الفهم من دائرة الباور، وهي المدخل الأساسي لتحديد أعطال الباور. ولتفحصها كاملة محتاج تفحص 27 خطوة مهمة.