اللي شغالين آيفون عندهم ملفات Panic والـ Real Time Log، بيعرفوا منها أعطال الريستارت والشبكة والواي فاي والكاميرا. طب وإحنا في الأندرويد؟ لو معالج الآيفون بيطلع تقرير باللي بيحصل، ليه معالج الأندرويد مايطلعش؟ بيطلع، واسمه Bug Report: تقرير أخطاء الجهاز.
الفكرة كلها إنك تبطل تشتغل بشكل عشوائي. تفتح موبايل العميل وانت عارف رايح فين، وهتعمل إيه بالظبط.
إيه الأعطال اللي الـ Bug Report بيفيد فيها؟
أي عطل بيحصل بعد ما الجهاز يقلع: شبكة، صوت، واي فاي، كاميرات، بصمة. الشرط إن الجهاز يشتغل ويتعرف على الكمبيوتر. جهاز فاصل باور مش مكانه هنا، ده ليه فحص تاني قبل الإقلاع.
وفيه ميزة حلوة: التقرير بيتعمل من لحظة إقلاع المعالج، يعني بيجيب لك كمان اللي حصل وقت ما الجهاز بيفتح. ولو تطبيق هو اللي بيعمل الريستارت وبيحمل مع الإقلاع، هتلاقي اسمه في التقرير.
بنسحب التقرير إزاي؟
- شغّل الجهاز وسيبه يفتح. ولو عطل شبكة، ركب شريحة قبل ما تبدأ.
- فعّل خيارات المطورين من جوه الجهاز، بالضغط على Build Number خمس مرات لحد ما تتفعل.
- وصل الجهاز بالكابل على الكمبيوتر. أنا بسحبه من تطبيق يلا موبايل، خانة ADB Monitor: اعمل Scan، اختار الجهاز، وبعدها خانة Bug Report واضغط Generate.
- استنى. العملية بتاخد من دقيقتين لتلاتة، وممكن توصل لخمس دقايق حسب سرعة الجهاز واللابتوب.
- افتح الفولدر، واختار أحدث تقرير بالتاريخ والوقت. وسط الملفات اللي هتطلع، إنت محتاج ملف الـ Bug Report بس.
لما تفتح الملف هتلاقي كلام كتير مش مفهوم. عادي، مش مطلوب منك تفهمه كله. اللي هيقرا معاك ChatGPT، بس لازم تعرف تكلمه.
الطريقة الأولى: بالسطور، وهي الأدق
ماتاخدش ملف التكست كله وتلصقه، الصفحة هتهنج. ابعت له أول سطور، من أول كلمة Dumpstate، وقوله الجهاز ده فيه عطل كذا. هيرد عليك إن الجزء ده لسه بتاع الإقلاع والجرافيك، وهيقولك يدور على مصطلحات معينة.
- خد كلمة من المصطلحات دي، زي Telephony.
- في ملف التكست دوّر عليها بـ Ctrl+F.
- علّم السطور اللي تحتها، خدها Copy، والصقها في المحادثة زي ما هي من غير ما تشرح حاجة.
- كرر لحد ما الصورة تبان.
اللي عنده مشكلة مع الإنجليزي مش محتاج يشغل باله بالكلام المكتوب. Copy و Paste، وهو يقرا.
الطريقة التانية: الملف كله مضغوط
- كليك يمين على فولدر التقرير، ومن برنامج 7-Zip اضغطه في ملف Zip.
- ارفع الملف المضغوط لـ ChatGPT.
- اكتب له الجهاز والعطل، واطلب بحث وتحليل دقيق.
- استنى. هو مضطر يفك الضغط ويدور في الملف، فسيبه ياخد وقته.
نص ممكن تبدأ بيه، وغير موديل الجهاز والعطل:
«دا bug report من جهاز (اكتب موديل الهاتف) فيه مشكلة شبكة. الرجاء البحث جيدًا واستخدام جميع المصادر الممكنة على الإنترنت في تحليل bug report تحليل دقيق لمساعدتي في تحديد مسبب العطل بدقة.»
أول نتيجة هنا مش هتبقى في دقة السطور. فاكتب له إنك محتاج بحث أعمق بسطور واضحة من التقرير وتحليلها، مش نتايج سريعة. هياخد وقت أطول، بس النتيجة بتقرب. وبعدها وجهه: عايز أتأكد الأول من قراءة الشريحة، الجهاز مش شايف شبكات 2G ولا 3G ولا 4G، وهكذا.
ليه ChatGPT بيديني نتايج غلط؟
في أغلب الوقت المشكلة في السؤال. الكلام اللي بتقوله له والسطور اللي بتديها له هي اللي بتحدد الرد، والتوجيه الصح هو الفرق. خد وادي معاه، وقارن كلامه باللي شايفه في الجهاز. مثلاً لو قال المعالج ميدياتك، ادخل تأكد من مواصفات الجهاز نفسه.
هل ده للشبكة بس؟
لأ. جهاز تاني جالي بعطل واي فاي، سحبت منه التقرير ومشيت خطوة بخطوة. أول حاجة قال إن الجزء ده خاص بمرحلة Setup Wizard، وفعلاً الجهاز كان متعمله فورمات. ولما كملنا قال إن العطل سوفت وير مش هاردوير، وكان الجهاز اتفحص هاردوير قبل كده لحد المعالج.
وأجمل حاجة إنه حدد مكان الدور: قال إن بعض أجهزة شاومي بتخزن بيانات الواي فاي في Persist وVendor. يعني حتى راجل السوفت وير عرف هيركز على إيه بدل ما يجرب.
الخلاصة
العملية كلها بتاخد منك 5 لـ 10 دقايق قبل ما تمسك الموبايل. مش بتديك العطل جاهز على طول، بس بتقولك هاردوير ولا سوفت وير، وبتختصر نص المسافة. نفس الكلام في أي عطل والجهاز شغال: اسحب التقرير الأول، وبعدين افتح.