السؤال بسيط: في الشحن العادي داخل للبوردة 5 فولت، والبطارية 8 فولت. ينفع تشحن بطارية 8 فولت بـ 5؟ لازم ترفع الجهد أعلى من جهد البطارية، عشان اتجاه حركة التيار يبقى داخل للبطارية.
نختبر الشحن العادي لوحده إزاي؟
عشان أثبت إن الموسفيتين بتوع الشحن السريع مش شغالين في الشحن العادي، عملت وصلة: كابل شحن مقطوع من ناحية السوكت، وطلعنا منه VBUS والأرضي والداتا.
الحركة هنا إني قفلت بين D+ وD-. التفاوض في VOOC بيتم على المسارين دول، فطول ما هم مقفولين الجهاز عمره ما هيدخل شحن سريع، وأي حاجة تتوصل هيعتبرها شاحن عادي. ولو على PD فالتفاوض بيتم على CC1 وCC2، والجهاز بتاعنا هنا تفاوضه على الداتا.
قسنا لقينا إيه؟
وصلت الوصلة في منفذ USB وتأكدت إن المنفذ سحب تيار، يعني البوردة استجابت للشحن العادي بخمسة فولت. الأفوميتر على DC: السالب على أرضي البوردة، والموجب على النقطة اللي عايز أقيسها.
الجهد الخارج لناحية البطارية في الشحن العاديحوالي 8.6 فولت
8.6 أعلى من 8 البطارية، يبقى التيار داخل للبطارية. والجهد ده مش جاي من كابل الباور سبلاي؛ اللي بيعمله هو آيسي الشحن العادي M2762A: عملية Boost بترفع من 5 لـ 8.6 تقريبًا.
الغلطة في برنامج المخططات
البرنامج رسم الملفين دول جنب الآيسي وقال إنهم مسؤولين عن توليد VPH، وعايز يثبت إن الآيسي ده هو اللي بيولده. طب نقيس:
- VPH عشان الدواير تشتغل محتاج حوالي 4 فولت. لو كلام البرنامج صح، يبقى المفروض ألاقي 4 على رجل المكثف بتاع الملف ده.
- قست على الرجلين: 4 مش موجودة.
- VPH جهد بيسيح في البوردة كلها. دوس على الرجل في الـ Bitmap: المفروض تنور نقاط كتير. مش موصلة بحاجة تقريبًا.
يبقى الملفين دول بيعملوا سويتش داخلي: الآيسي بياخد 5 ويعمل لها سويتش ويطلع 8. والبرنامج كمان ماطلعش الموسفيتين وهو جاي من كونكتور البطارية، وماقربش ناحية VOOC أصلاً.
نفحص الشحن السريع إزاي؟
الموسفيتين بوابتهم بتتقفل بإشارة واحدة. أول حاجة تعرف بيها إن الدايرة شغالة إنك تقيس على رجل البوابة. وفي الشحن العادي لقيتها صفر فولت، وده طبيعي. ودليل تاني: النقط التلاتة المتوصلة ببعض على الموسفيت هيبقى عليها جهد لما تشحن شحن سريع.
توصل لآيسي USB Control من غير ما تعتمد على البرنامج
- روح للـ Bitmap، وعد رجول كونكتور الشحن لحد مسارات D+ وD-.
- المسارات دي بتعدي على فلاتر أو مقاومات توالي. دوس على الرجل التانية من المكون التوالي.
- هتدخلك على آيسي، ده USB Control.
- من رجل التحكم فيه هتلاقي مقاومة توالي، اعبر للناحية التانية، توصل لآيسي VOOC.
المقاومة التوالي دي هي مفتاح التشخيص، لأن الجهد بيظهر عليها لما توصل شاحن VOOC. لو لقيت جهد عليها، يبقى USB Control عمل اللي عليه:
| على مقاومة التحكم | على بوابة الموسفيت | المشكلة فين |
|---|---|---|
| جهد موجود | مفيش جهد | آيسي VOOC |
| جهد موجود | جهد موجود | الموسفيتين، أو مسارات V-Sense وI-Sense |
طب VPH الحقيقي فين؟
أنا لما بحب أرسم أي دايرة ببدأها من جهد التغذية الرئيسي. فتعالى من دايرة الشاشة. آيسي الـ OLED بيولد 3 جهود: 7 فولت، و4.6 فولت موجب، و4.4 فولت سالب. جهد VPH داخل للآيسي ده على الملف عشان يتعمل له سويتش، فلو جبت الملف ده من ناحية الدخل، هتلاقي VPH.
وهنا كمان البرنامج ناقص: فيه فلتر توالي على المسار مارسموش، فلو ماشيت وراه هتقف. افهم الدايرة الأول، وارجع ورا الملف والمكون التوالي لحد الآيسي اللي بيولد الجهد.
ليه لازم ترسم بلوك دايجرام؟
الاسكيماتيك مش بيرسم الدايرة كلها مع بعضها. كونكتور الموصلة في صفحة، كونكتور البطارية في صفحة، الآيسي في صفحة، الموسفيتين في صفحة، USB Control في صفحة، وآيسي الشحن العادي في صفحة. والحلول الجاهزة زي ما شفت ناقصة ومتفرقة. البلوك دايجرام بيلم ده كله في صفحة واحدة، عشان لما تدخل الاسكيماتيك ماتتوهش.